హైదరాబాద్:
ఉప ఎన్నిక ఫలితాలు ఆశించిన విధంగా రాకపోయినా, పని పట్ల నమ్మకం కోల్పోవాల్సిన అవసరం లేదని బీఆర్ఎస్ వర్కింగ్ ప్రెసిడెంట్ కేటీఆర్ స్పష్టం చేశారు. ఫలితాలు ప్రతిసారి మన కృషిని, నిబద్ధతను ప్రతిబింబించవని—ఆయన వెల్లడించారు. అయితే ప్రజల నుంచి వస్తున్న ఆదరణ, ధైర్యాన్నిచ్చే సందేశాలు ఎంతో ఉత్సాహాన్నిస్తాయని కేటీఆర్ పేర్కొన్నారు.
తనకు మద్దతు ఇస్తున్న ప్రతి ఒక్కరికీ ఆయన కృతజ్ఞతలు తెలిపారు. జూబ్లీహిల్స్ ఉప ఎన్నిక తర్వాత భారీ సంఖ్యలో పార్టీ శ్రేయోభిలాషులు సోషల్ మీడియాలో పంపిన ప్రోత్సాహక సందేశాలను కేటీఆర్ తన ట్విట్టర్లో షేర్ చేశారు.
తమ పార్టీకి ఇంకా బలం చేకూరాలని, కేటీఆర్ కృషి వృథా కాదని మద్దతుదారులు పేర్కొన్నారు. ఈ ఎన్నికలో జరిగిన అన్యాయాలను కూడా కొంతమంది ప్రస్తావించారు. ఎన్నికల ప్రక్రియలో అధికార పార్టీ పెద్ద ఎత్తున ఉల్లంఘనలు చేసిందని, వేల ఫేక్ ఓట్లు నమోదయ్యాయని వారు ఆరోపించారు. ముఖ్యమంత్రి స్వయంగా ఎనిమిది రోజుల పాటు జూబ్లీహిల్స్లో తిరగాల్సి వచ్చిందంటే పరిస్థితులు ఎలా ఉన్నాయో అర్ధమవుతుందని పేర్కొన్నారు.
కేటీఆర్ నేతృత్వంపై భరోసా వ్యక్తం చేసిన శ్రేయోభిలాషులు, ఒక ఉప ఎన్నిక ఓటమితో నాయకుడి విలువ తగ్గదని, రాబోయే రోజుల్లో ఆయన నాయకత్వం మరింత బలంగా నిలుస్తుందని విశ్వాసం వ్యక్తం చేశారు. హైదరాబాద్, తెలంగాణ అభివృద్ధికి కేటీఆర్ చేసిన కృషి ఎంతో గొప్పదని—ఆయనలాంటి నాయకులు రాష్ట్రానికి దిశానిర్దేశం చేస్తారని అభిప్రాయపడ్డారు.
ఈ ఉపఎన్నికలో కేటీఆర్ చూపిన స్పూర్తి, పట్టుదల పార్టీకి కొత్త శక్తిని ఇస్తుందని, లక్షలాది మంది భవిష్యత్తులో ఆయనకు అండగా ఉండేందుకు సిద్ధంగా ఉన్నారని బీఆర్ఎస్ నాయకులు, అభిమానులు కామెంట్ చేశారు.
